خدمة فبلاد أجنبية كتكون فرصة مزيانة، ولكن حتى كتجي معاها مشاكل. كاين بعض الناس لي كيشغلوك ومكيعطيوكش حقك: مكيخلصوكش، كيعاملوك بالعنف، كيزيدوك فالسوايع بلا خلص، ولا كيتعاملو معاك بحگرة.
إلا كنت مهاجر أو خدام بلا كونطرا، يمكن تخاف تشكي. ولكن خاصك تعرف بلي فإسبانيا عندك حقوق الشغل، سواء كنت قانوني ولا لا. القانون كيحمي الخدام.
⚠️ بعض حالات الاستغلال لي كيتعرضولها الناس:
- مكيعطيوكش الخلاص ولا كيعطيوك أقل من المتفق عليه.
- مكيعطيوكش كونطرا ديال الخدمة.
- كتخدم كثر من السوايع بلا خلص إضافي.
- مكيعطيوكش نهارات الراحة ولا الفاكَنس.
- السب، العياط، الحگرة.
- التهديد إلا سولتي على حقك.
- كيطردوك بلا سبب.
✅ شنو خاصك تدير إلا مول الخدمة كيتعدى عليك؟
1. جمع الدلائل
قبل ما تشكي، حاول تجمع أي حاجة كتثبت شنو واقع:
- ميساجات فالواتساب.
- تصاور فلبلاصا لي خدام فيها.
- شهود (صحابك فخدمة).
- الأوقات لي خدمتيها، شحال تخلصتي، شنو درتي.
2. هضر مع مول الشغل (إلا قدرت)
أحياناً ممكن تحل المشكل بالكلام، بهدوء، وتفكرّو بحقوقك.
ولكن إلا كاين تهديد، سب أو عنف، ماتهضرش: شكي.
3. سير عند النقابة
النقابات كيعاونو الناس، حتى لي ماعندهومش أوراق. يقدرو:
- يعاونوك تشد رزقك.
- يشكيو معاك.
- يوقفو معاك إلا طردوك.
بعض النقابات:
- CCOO: www.ccoo.es
- UGT: www.ugt.es
- CNT: www.cnt.es
4. شكي فمفتشية الشغل
تقدر تشكي بلا ما تكتب سميتك.
موقع رسمي: expinterweb.mites.gob.es/denuncias
كتشرح شنو واقع وكترفق الدلائل. هوما كيديرو التفتيش على الشركة.
5. مساعدة قانونية فابور
كاينين جمعيات لي كيعاونو الناس مجاناً:
- مكاتب الهجرة (Oficinas de Extranjería)
- الخدمات الاجتماعية فالجماعة.
- جمعيات بحال كاريتاس، الصليب الأحمر، CEAR.
- جمعيات مغاربة أو مسلمين فإسبانيا.
🧕 وأنا ماعندي أوراق؟
حتى نتا/نتي عندك الحق تشكي. القانون كيحميك.
ماشي حيت ماعندكش إقامة خاصك تخدم ببلاش. وبالعكس، إلا شكيت على استغلال خطير، تقدر تبدأ طريق تسوية الوضعية.
🙏 نصائح أخيرة:
- ماتخافش تطلب حقك.
- القانون فصفك.
- هضر مع ناس كيعرفوك ويعاونوك.
- الكرامة ماشي للبيع.